Llewelyn Beukes (18), rugbykaptein: Hoërskool Witteberg.
Dit is vir hom ’n groot eer om die span te lei en hy is vasbeslote om sy span op ’n positiewe en inspirerende manier leiding te gee.
Llewelyn sê dat dit vir hom belangrik is om ’n omgewing van samewerking, respek en harde werk te skep. Sy doel is om elke speler se vaardighede te ontwikkel, hul vertroue te versterk en hulle te motiveer om hul beste te alle tye te gee.
’n Hoogtepunt vir hom in die rugbyseisoen was hul wedstryd teen Welkom-Gimnasium.
“Ons was ’n gedugte span met ’n hegte broederskap wat as span ons alles in die wedstryd gegee het.”
Llewelyn sê ’n goeie leier op die rugbyveld het sekere eienskappe nodig, soos om met die spanlede te kommunikeer, hulle te motiveer en te rig, leierskap om in moeilike situasies te lei, en ’n sterk werksetiek om ’n voorbeeld te stel vir die res van die span.
“Ek probeer hierdie eienskappe toepas in my leierskapsrol deur te luister na my spelers, hulle aan te moedig en ondersteuning te bied wanneer nodig, en altyd hard te werk op en vanaf die veld. Ons sien baie uit na ’n opwindende derby en ons span fokus op die positiewe.”
