’n Byna tasbare energie van groot opwinding heers in Kroonstad.
Die derde Ignite and Revive-familiefees is om die draai, en pret vir oud en jonk is weer op vanjaar se program.
Die fees word van Vrydag 30 Augustus tot 1 September in Kroonstad aangebied, soos verlede jaar by die North High School (ou Rooiskool).
Sportgeesdriftiges kan uitsien na die eerste Kroonstad TENS-sporttoernooi, waarin rugby-, Fast Five-netbal- en ringbalspanne mekaar die stryd gaan aansê.
Spanne van alle ouderdomme word aangemoedig om hulle vir die Kroonstad TENS in te skryf. Inskrywing kos R300 per volwassene en R100 tot R220 per kind. Elke deelnemer wat inskryfgeld betaal, kry ook ’n geskenksak en gratis toegang tot die fees vir die naweek.
Kroonstad TENS word moontlik gemaak deur George TENS en Ultimate Sports Nutrition (USN) as borg.
Almal word ook genooi om aan die 5 km-pretdraf, aangebied in samewerking met die Kroonstad-multisportklub, deel te neem.
Die rugbywedstryd tussen die Springbokke en die All Blacks sal op ’n grootskerm vertoon word, dus kan almal dit hier kom geniet.
Die ATKV bring drie produksies na die fees. Die kinderproduksie Die mooiste monsters op safari beloof om oud en jonk op ’n avontuur te neem.
Die komiese produksie Sjarrap en eet jou kos, met dramaturg en aktrise Ilne Fourie, beloof op sy beurt skaterlag-vermaak.
Die indringer is ’n hedendaagse weergawe van die verhaal van die barmhartige Samaritaan uit die pen van die bekende skrywer Maretha Maartens.
’n Landbou-uitstalling word boonop aangebied, met die nuutste in die bedryf wat besigtig kan word.
’n Wye verskeidenheid stalletjies en uitstallers sal ’n uiteenlopende aanbod produkte na elkeen se smaak aanbied.
Op die spyskaart is daar iets vir elke honger maag en droë keel.
Die program van die vermaaklikheidskunstenaars se fees-optredes lyk soos volg:
Vrydag 30 Augustus
16:00 – Duane van der Berg
17:00 – Carmen Basson
18:00 – Carma
19:00 – Demi Lee Moore
20:00 – Riaan Benadé
21:00 – Alterego
22:00 – Die Piesangskille
Saterdag 31 Augustus
15:00 – Duane van der Berg
16:00 – Jemma Catherine
17:00 – 19:00 Springbokke t. All Blacks
Optrede in rustyd – Carmen Basson
19:00 – Carma
20:00 – Dodo
21:00 – Ruhan du Toit
22:00 – Spoegwolf
Seremoniemeester – Carma
Sondag 1 September
08:30 – Carma
09:00 – The Shelter
Johan Vorster
Bernice West
Jacomien de Wet
Arnold de Wet
10:00 – Ds. Christo Weideman
Seremoniemeester – Charl Marais
Die Ignite and Revive-span sê hy sien daarna uit om al die besoekers op vanjaar se fees te ontvang.
Vir meer inligting besoek die sosialemediaplatforms van Ignite and Revive, of gaan na igniteandrevive.co.za.
VrystaatKroon is die gedruktemediaborg van die Ignite and Revive-familiefees.
